सुस्ताबाट भारत प्रवेशमा नेपालीलाई रोक

पश्चिम नवलपरासीको ऐतिहासिक सुस्ता गाउँ हुँदै भारत प्रवेश गर्न लागेका नेपाली नागरिकहरूलाई भारतीय सुरक्षाकर्मी एसएसबी (SSB) ले रोक लगाएको छ। भारतीय पक्षको यो मनोमानी व्यवहारले स्थानीय बासिन्दाहरूलाई सास्ती भोग्न बाध्य बनाएको छ।

नेपाली नागरिकहरू प्रायः बजार तथा अन्य आवश्यक कार्यका लागि भारतको बिहार राज्य अन्तर्गत बगहा जिल्ला जाने गर्छन्। तर हालसालै चकदहवामा अवस्थित एसएसबी क्याम्पबाट आएका सुरक्षाकर्मीहरूले सुस्ताको भूमि हुँदै भारत प्रवेश गर्न खोज्ने नेपालीहरूलाई रोक लगाइरहेका छन्।

नेपाल पत्रकार महासंघ, पश्चिम नवलपरासीका कोषाध्यक्ष श्याम बुचा मगर स्वयं उक्त समस्यामा परेका थिए। उनी नारायणी नदीको झुलुङ्गे पुल पार गरेर भारत जान लाग्दा एसएसबीले प्रवेशमा रोक लगाएका थिए। करिब ४५ मिनेटसम्म चकदहवा एसएसबी कार्यालयका प्रमुखसँग छलफल गरेपछि मात्र उनलाई भारतीय नम्बर प्लेट भएको सवारी प्रयोग गरी जान अनुमति दिइएको थियो।

स्थानीय मोल्बि साहेब भन्छन्, “हामी नेपाली बजार टाढा पर्छ भनेर बाध्यतावश भारतको बजार जान्छौं, तर भारतीय सुरक्षाकर्मीले हरेकचोटि सास्ती दिन्छ।”

स्थानीय बासिन्दाहरूले जनाएअनुसार, उनीहरू सानोतिनो किनमेलका लागि नजिकको भारतीय बजार जाने गर्छन्। तर एसएसबीको मनोमानी व्यवहार र आवतजावतमा लगाइएको रोकले उनीहरू अन्यौलमा परेका छन्।

स्थानीय मोल्बि साहेब भन्छन्, “हामी नेपाली बजार टाढा पर्छ भनेर बाध्यतावश भारतको बजार जान्छौं, तर भारतीय सुरक्षाकर्मीले हरेकचोटि सास्ती दिन्छ।”

यस विषयमा सशस्त्र प्रहरी बल नेपाल, २६ नम्बर गण नवलपरासीका प्रमुख सन्तोष रायमाझी भन्छन्, “भारतीय सुरक्षाकर्मीहरूले सुरक्षाको कारण देखाउँदै कहिलेकाहीं नेपाली नागरिकलाई रोक लगाउने गरेका छन् भन्ने जानकारी पाइएको छ।”

स्थानीय नागरिकहरूका अनुसार, भारतीय नागरिकले जुनसुकै बेला नेपाली भूमिमा सवारीसहित प्रवेश पाउने, तर नेपाली नागरिकलाई भने रोक लगाइनु दुई देशबीचको असमान व्यवहार हो।

स्थानीयहरू यो समस्याको स्थायी समाधानका लागि नेपाल सरकार र कुटनीतिक निकायको प्रभावकारी पहलको माग गर्दै आएका छन्।