बर्दघाट नगरपालिकाले ९७ करोड ७२ लाखको बजेट सार्वजनिक

बर्दघाट नगरपालिकाले आर्थिक वर्ष २०८२/८३ का लागि कुल रु ९७ करोड ७२ लाखको बजेट सार्वजनिक गरेको छ। नगरपालिकाको १६औं नगरसभाबाट उपप्रमुख रुद्र प्रकाश उपाध्यायले बजेट प्रतिवेदन प्रस्तुत गर्नुभएको हो।

प्रस्तुत बजेटमध्ये रु ५७ करोड ४७ लाख चालू खर्चका लागि र रु ४० करोड २७ लाख पूँजीगत खर्चतर्फ विनियोजन गरिएको छ।

बजेट स्रोत विवरण यस प्रकार छ:

संघीय सरकारबाट : रु ५३ करोड ७० लाख

प्रदेश सरकारबाट : रु ३ करोड ५७ लाख ३८ हजार

आन्तरिक स्रोत (अघिल्लो वर्षको बचतसहित): रु १६ करोड

राजस्व बाँडफाँट : रु २३ करोड ९४ लाख ६२ हजार

नागरिक लागत सहभागिता : रु ५० लाख (अनुमानित)

स्रोत अनुसार बजेट (रु करोडमा)

संघीय सरकार          ████████████████████████  53.70
राजस्व बाँडफाँट       ██████████████            23.94
आन्तरिक स्रोत          ████████                  16.00
प्रदेश सरकार           ██                        3.57
नागरिक सहभागिता       ▓                         0.50 (अनुमानित)
——————————————–
                       कुल: रु 97.72 करोड

त्यस्तै, बजेटमा बिपद् व्यवस्थापन कोषतर्फ रु ४० लाख र नमुना वडा विकास कार्यक्रमतर्फ रु १ करोड विनियोजन गरिएको उल्लेख गरिएको छ।

नगरपालिकाले कृषि, स्वास्थ्य, शिक्षा र पर्यटन प्रवर्द्धनलाई नीति तथा कार्यक्रममार्फत प्राथमिकता दिएको जनाएको छ। नगरप्रमुख शम्भुलाल श्रेष्ठका अनुसार, नगर गौरवका योजनाहरूलाई पनि बजेटमा विशेष प्राथमिकता दिइएको छ। साथै, वडाबाट आएका योजनाहरूलाई प्राथमिकता दिँदै बजेट संशोधन गरिएको जानकारी दिनुभएको छ।

नगरसभाले कार्यकाल समाप्त भइसकेका सबै विषयगत समितिहरू बिघटन गर्ने निर्णयसमेत गरेको छ। अब नयाँ समितिहरू गठन गरी काम अगाडि बढाइने नगरप्रमुख श्रेष्ठले बताउनुभयो।

नगरसभाबाट विभिन्न विधेयक तथा ऐनहरू सर्वसम्मतिले पारित गरिएको छ। अन्तिम नगरसभा असार २७ गते हुने जानकारी नगरपालिकाले दिएको छ।